മുറ്റത്തെ പൂക്കളമെങ്ങ് പോയി
മുക്കുറ്റിപൂക്കളുമെങ്ങു പോയി...
തുമ്പയും തെച്ചിയും കണ്ണാന്തളികളും
കണ്ണീരിനുള്ളിൽ മറഞ്ഞുപോയി....
പൊന്നോണത്തുമ്പികളെങ്ങ് പോയി...
പൂപൊലിപ്പാട്ടുകളെങ്ങു പോയി....
ആവണിപ്പൊൻനിലാവെങ്ങ് പോയി...
പൊൻക്കതിർപ്പാടവുമെങ്ങു പോയി...
മഞ്ഞക്കുറിമുണ്ടു ചുറ്റി നടക്കുന്ന
കുഞ്ഞുങ്ങളെല്ലാരുമെങ്ങു പോയി...
കോടികസവുടുത്താടി തിമിർക്കുന്ന
ഗ്രാമീണകന്യകളെങ്ങ് പോയി....
തൃക്കാക്കരയപ്പനുമെങ്ങു പോയി..
പാണന്റെ പാട്ടുമതെങ്ങു പോയി....
ചിങ്ങ വെയിലൊളിയെങ്ങ് പോയി....
പൊന്നൂഞ്ഞാലാട്ടവുമെങ്ങു പോയി....
ഓണക്കിളികളുമെങ്ങു പോയി...
ആർപ്പു വിളികളുമെങ്ങു പോയി....
എങ്ങുപോയെങ്ങ്പോയെങ്ങ്പോയി....
എല്ലാരുമെല്ലാതുമെങ്ങു പോയി...
